ԱՐԱԳԱԾ - Համաձայն V դարի պատմիչ Մովսես Խորենացու, Արամանյակը հայերի նախահոր՝Հայկ նահապետի  որդին էր։ Հայկի մահից հետո .

Արամանյակը, ամբողջ բազմությունն առնելով չվում է դեպի հյուսիս-արևելք և գնում, իջնում է բարձրագագաթ լեռներով շրջապատված մի խոր դաշտավայր, որի միջով մի կարկաչահոս գետ է անցնում արևմտյան կողմից, և դաշտի արևելյան մասը կարծես մեջքի վրա պառկած երկարությամբ  ձգված է արեգակի կողմը, իսկ լեռների ստորոտներում բխում են բազմաթիվ ականակիտ աղբյուրներ, որոնք միանալով, գտեր կազմելով հեզաբար հոսում են նրանց սահմանների  մոտ, լեռների ստորոտներով և դաշտի եզերներով, կարծես թե որպես պատանիներ պտտվում են երիտասարդուհիների շուրջը: Իսկ հարավային արեգակնասլաց լեռը, սպիտակափառ գագաթով, ուղիղ բուսել է երկրից՝ պինդ գոտեվորված մարդու երեքօրյա ճանապարհի շրջապատով և հետզհետե սրվում է դեպի վեր, իսկապես մի ծերունի լեռ երիտասարդացած լեռների մեջ: Արամանյակն այս խոր դաշտում բնակվելով՝ շենցնում է մի մասը դաշտի հյուսիսային կողմում և լեռան ստորոտը նույն կողմում. Լեռն իր անվան նմանությամբ կոչում է Արագած, իսկ կալվածը՝ Արագածոտն: Մովսես Խորենացի ,,Հայոց Պատմություն,,

Ու անտիկ դարերի խորքից եկավ անունն Արագածոտն ու գնում է հավերժի ճամփով Հայաստան աշխարհում: